छत्तीसगढ़ स्थापना दिवस सुअवसर मा चर्चित लेखक घनश्याम तिवारी ह “कोरबा मितान” के करीस गठन

कोरबा। छत्तीसगढ़ स्थापना दिवस के उपलक्ष्य मा कोरोना के अनुशासन के पालन करत हमर कोरबा के लोकसदन परिवार के डहर ले साहित्य भवन कोरबा मा एक छोटकन आयोजन होइस जिहाँ एक नवा संस्था के नीव धरे गिस जेखर नाव हे”कोरबा मितान” ए समिति मा छत्तीसगढ़ राज के जुड़े जम्मो कला अउ संस्कृति के परंपरा ला अउ भाखा ला पोठ करे के उद्देश्य ले बनाए गे हे।छत्तीसगढ़ राज के कोरबा जिला के वरिष्ठ पत्रकार ,सशक्त साहित्यकार एवं लोकसदन के संपादक आदरणीय श्री सुरेशचंद्र रोहरा जी के सुघ्घर मार्गदर्शन ले ए कार्यक्रम के आयोजन करे गिस।ए कार्यक्रम के माय पहुना के रुप मा अँचल के वरिष्ठ साहित्यकार एवं सांस्कृतिक क्षेत्र के पुरोधा मुख्य अतिथि श्री नरेश चन्द्र नरेश जी रिहिन,संगे संग विशिष्ट अतिथि श्रीमती अंजना सिंह ठाकुर,डॉ मंजुला साहू रहिस।कार्यक्रम के संचालन ला रमाकांत श्रीवास मन करत रहिन।कार्यक्रम के सुरुआत शारदा दाई के वंदना ले होइस जेला आशा आजाद”कृति”के द्वारा करे गिस।हमर भारत के सुघर परंपरा ला ध्यान धर सब अतिथि अउ दर्शक मन के स्वागत कुमकुम लगा के करे गिस।स्वागत भाषन ला संस्था के अध्यक्ष घनश्याम तिवारी जी द्वारा करे गिस जेन समिति के उद्देश्य ल सबके आघु मा रखिन अउ एकर काम काज ला क इसन ढंग ले करे जाही एला सुघर ढंग ले बताइन।
एखर बाद अतिथि मन के उद्बोधन होइस जेमा अंजना सिंह ठाकुर हा कहिस के हमला जुरमिल के संस्था के काज ला करना अउ आधू बढ़ाना हे,डाँ.मजूँला हा कहिस सुघर कोरबा मितान संस्था के गठन होइस है एमा हमला छत्तीसगढ़ राज के जम्मो जेन परंपरा छूटत जाथे ओला आधू लाना हे।अंत मा हमर मुख्य अतिथि नरेश चन्द्र नरेश जी द्वारा कोरबा मितान संस्था के सुघ्घर नाव के बधाई ला देतै हुए कहिन के छत्तीसगढ़ राज मा मितान शब्द हा बहुत बड़े आय,एखर गुन ला बतावत ओखर नाव अनुसार काज करे के सुघ्घर मार्गदर्शन करिन अउ छत्तीसगढ़ मा अपन काज ले पहिचाने जाय”कोरबा मितान” अइसन जनसंदेश होना चाही।
कार्यक्रम के अंत मा जम्मो उपस्थित साहित्कार मन छत्तीसगढ़ी भाखा मा कवितापाठ करिन अउ छत्तीसगढ़ स्थापना दिवस के खुशी मनाइन।उपस्थित सदस्य मा घनश्याम तिवारी,आशा आजाद”कृति”,श्री रंधावा प्रसाद,श्री प्रभात कटगीहा, श्री दीपक साहू, श्रीमती मीनाक्षी तिवारी जी मन उपस्थित रहिन अउ कार्यक्रम के गौरव ला बढ़ाइन। कार्यक्रम के संचालन अउ आभार प्रदर्शन श्री रमाकांत श्रीवास ह करिस । समिति ” कोरबा मितान के समस्त पदाधिकारी मन के घोंषणा अउ शपथ ग्रहण बड़ जल्दी करै के बात भी संचालक महोदय ह बताईन ।